A importancia da estimulación sensorial
Nos primeiros meses de vida do bebé, o desenvolvemento sensorial é de vital importancia, xa que será o punto clave de desenvolvemento de outros, como o cognitivo ou social.
A través da estimulación sensorial, os nenos experimentan a percepción dos obxectos e elementos que os rodean, comprendendo con maior facilidade a utilidade de cada un deles.
No blog de hoxe recomendámosvos unha serie de actividades que facilitan o aprendizaxe e a exploración a través da estimulación dos seus sentidos. Esperamos que vos sirvan de referencia.
Actividades de estimulación auditiva
As actividades de estimulación auditiva mellorarán a capacidade dos pequenos para percibir os sons. A partir do primeiro mes comezarán a buscar a procedencia dos sons que o rodean levemente, e sobre o medio ano comezarán a imitalos.
A continuación, comentámosvos algunhas actividades que podedes facer cos vosos peques, e que axudarán ao recoñecemento auditivo e a comprensión do entorno.
Elementos sonoros
Emprega obxectos cotiáns que emitan sons distintivos, como chaves que tintinean ou un axóuxere. Ao facelo, os bebés non só experimentarán distintos sons, senón que tamén comezarán a relacionalos con obxectos concretos.
Xoguetes que emitan sons
Os xoguetes que emiten sons, como bonecos que apertas e soan, son excelentes para manter a atención e o interese dos nenos. Estes xoguetes non só proporcionan estimulación sensorial, senón que tamén fomentan o xogo interactivo e o desenvolvemento de habilidades motoras ao manipulalos.
Cando son máis pequenos, podes optar por bonecos que reproduzan sons de animais e, cando sexan máis maiores, por aqueles que xa emiten frases ou copian o que se lles di.
Ler libros e imitar sons
A lectura é unha actividade imprescindible dende que son pequenos. Ademais de inculcar un hábito de lectura, lerlles en voz alta e con distintos tons estimulará o seu oído e comezará a asociar a intensidade da voz coas emocións.
Actividades de estimulación visual
A capacidade visual dos nenos desenvólvese nos primeiros meses de vida, por iso, é de vital importancia estimulala dende que son bebés.
A través de actividades visuais, desenvolverán habilidades de percepción visual, atención e coordinación ollo-man, mentres exploran conceptos como a cor, a forma e o movemento.
Estes son algúns dos xoguetes que podes empregar para fomentar o desenvolvemento visual:
Móbiles de berce
Os móbiles son un accesorio de estimulación visual para os máis pequenos. Ao principio, só observarán as súas cores e formas, pero, a medida que se van facendo máis maiores, comezarán a querer collelos e tocalos, estimulando ao mesmo tempo o tacto.
Xogos con luces e espellos
Os xogos que inclúen luces e espellos fascinan aos bebés, proporcionándolle unha estimulación visual única. Ao ollar os patróns de luz e os reflexos no espello, explorarán conceptos como o movemento, a forma e a profundidade.
Torre amontoable
As torres de amontoar pezas son excelentes para a coordinación man-ollo e a percepción das dimensións. Ao amontoar e manipular os bloques de diferentes tamaños e formas, aprenderán conceptos como o equilibrio, a estabilidade e a relación espacial, mentres desenvolven habilidades motoras finas e visuais.
Actividades de estimulación táctil
A estimulación táctil é esencial no desenvolvemento sensorial dos bebés, xa que o sentido do tacto é un dos primeiros en desenvolverse.
A través de actividades táctiles, non só experimentarán unha variedade de sensacións, como a suavidade, rugosidade ou temperatura, senón que tamén desenvolverán habilidades motoras finas ao manipular obxectos de diferentes texturas e materiais.
Aquí vos deixamos algunhas mesas sensoriais que podedes facer. Son unha das mellores opcións para a estimulación temperá dos peques. Con elas, xogarán e experimentarán, pero, sobre todo, divertiranse mentres aprenden cousas novas.
Mesa sensorial con xelatina e obxectos de gran tamaño
A xelatina é un alimento moi sinxelo de manexar, podendo apalpala ao noso antollo. A súa textura aporta unha estimulación sensorial indescritible.
Fai unha mesa sensorial enchendo un recipiente grande con xelatina e esconde obxectos de distintos tamaños e texturas no seu interior. Ao mergullar as mans na xelatina e buscar os obxectos ocultos, os peques experimentarán unha variedade de sensacións táctiles.
Mesa sensorial con alimentos
Nos diferentes departamentos da mesa sensorial, podes poñer dende alimentos, como pasta, ata grandes pezas de madeira, ou area. Completa a experiencia engadindo algún obxecto co que poidan manipular os elementos, como un rastro, unha cunca ou unha xerra, por exemplo.
Pintura de dedos caseira
Prepara pintura de dedos caseira empregando ingredientes seguros e non tóxicos, como fariña, auga e colorante alimentario.
Esta actividade tamén fomenta a coordinación man-ollo e a conciencia sensorial.
Actividades de estimulación olfactiva
O sentido do olfacto está estreitamente ligado coa memoria e as emocións, o que fai que a estimulación olfactiva sexa especialmente significativa no seu desenvolvemento.
O facer actividades que involucran distintos aromas, desenvolverán este sentido, aprenderán a identificar e asociar distintos olores coa súa procedencia, e explorarán o mundo dunha maneira única e enriquecedora.
Estes só son algúns dos materiais que podedes empregar para estimular o sentido do olfacto.
Frasco de olores
As botellas con diferentes olores son un clásico. Estas botellas énchense con algunha planta aromática, especia ou aceite esencial, podendo engadirlle canela, limón ou esencia de vainilla. Ao abrir os frascos e cheirar os distintos aromas, os nenos experimentan unha variedade de olores e aprenden a identificar e vincular cada aroma coa súa procedencia.
Bandexa olfactiva estacional
Nunha bandexa, pon pequenos elementos que emitan olores característicos, propios da estación do ano na que te atopes. Por exemplo, en primavera, recolle varias flores, para que o peque asocie o cheiro das flores coa época na que se encontra.
Froitas e os seus olores
Engade unha variedade de froitas frescas e maduras, con olores característicos, como laranxas, amorodos, piña ou melocotón, e permite que os peques a manipulen e a cheiren.
Ao explorar as froitas e os seus aromas naturais, aprenderán sobre a diversidade de olores no mundo que os rodea e desenvolverán habilidades de discriminación olfactiva. Ademais, esta actividade promove a conciencia sensorial en relación cos alimentos.
Potencia o desenvolvemento sensorial do teu peque con Bebé Gadis
Que che pareceron as nosas propostas para estimular os sentidos? Potenciar o desenvolvemento sensorial con algunha destas actividades e xogos é moi sinxelo e ao teu bebé encantaralle.
Cada neno é único e o ritmo de desenvolvemento pode variar, polo que é importante adaptar cada actividade ás necesidades individuais e preferencias de cada peque.
Outros contidos de Bebé Gadis sobre o desenvolvemento dos nosos peques: como estimular a linguaxe do teu bebé e fases do desenvolvemento cognitivo en nenos e nenas.
