Consellos para evitar o contaxio de piollos e como tratalos

Ao iniciarse o curso escolar é moi frecuente que aparezan entre os máis pequenos/as as ben coñecidas infestacións de piollos, unha circunstancia sen gravidade, pero bastante molesta polos proídos que provoca no coiro cabeludo do/a portador/a.

Os piollos son pequenos insectos que se alimentan do noso sangue e atópanse na cabeza. As femias producen unha substancia pegañenta que adhire as lendias ao coiro cabeludo ata que se produce a eclosión. Reprodúcense relativamente rápido polo que é importante empezar a tratalos en canto detectemos a súa presenza.

Aínda que sexa algo moi común en nenos e nenas, convén tomar medidas de prevención para tentar evitar o contaxio. Hai que ter en conta que algunhas persoas son alérxicas a estas picaduras polo que o proído pode chegar a ser máis molesto, sobre todo polas noites, cando os piollos están máis activos.

Como se contaxian os piollos?

Debemos ter presente que os piollos se contaxian polo contacto directo do pelo co parasito, situado noutra cabeza con piollos, en ningún caso se transmiten por falta de hixiene ou saltando dunha cabeza a outra como se tende a crer. Ademais, non saen da cabeza, e só os atoparemos nos pelos do coiro cabeludo.

É conveniente ter en conta algunhas medidas para manter a cabeza dos nosos fillos/as libre de piollos.

6 consellos para previr os piollos na cabeza dos nenos/as

  1. Evita que os nenos/as compartan toallas, gorros, bufandas, cepillos ou peites.
  2. Asegúrate de lavar a roupa e sabas nas que durman a máis de 50ºC para eliminar calquera parasito.
  3. Revisa con frecuencia o pelo dos nenos/as cun peite de púas finas para eliminar posibles lendias. Pasar o peite das lendias cada 3 días é unha práctica moi recomendable en época de piollos.
  4. Está totalmente desaconsellado utilizar os xampús para o tratamento dos piollos como medida preventiva, ademais de que pode aumentar a resistencia cando estes aparezan.
  5. En nenos/as con pelo longo procura que o leven recollido ao colexio, parque ou lugares onde vaian estar con máis nenos/as.
  6. Os produtos naturais que existen no mercado non teñen eficacia científica demostrada, como pode ser o aceite de árbore de té, aceite de lavanda, vinagre ou aceite de eucalipto.

Seguindo estes consellos podes conseguir que o teu fillo/a non se contaxie, ou na súa falta, atallar a infestación o máis pronto posible para que sexa máis sinxelo terminar cos piollos.

Se xa apareceron os piollos… toma nota para eliminalos!

Nesta época é case inevitable que os peques se contaxien de piollos así que non te preocupes! Se xa notaches que o teu fillo/a se rasca a cabeza e ten molestias, podes seguir estes consellos para eliminalos:

  • En primeiro lugar, é importante ser paciente e constante nos tratamentos.
  • Pide consello ao teu pediatra ou farmacéutico/a para que che recomende produtos como xampús ou locións indicados para acabar cos piollos de forma efectiva e inocua para os nenos/as.
  • Repite o tratamento aos 7 ou 10 días xa que nese tempo xa se produciu a eclosión os novos ovos e podería volver infestarse.

Sobre todo, nesta época de inicio de curso recomendámosche estar máis pendente da revisión da cabeza do teu fillo/a. Finalmente, é recomendable que se o teu fillo/a ten piollos deas aviso ao colexio para que poidan informar ao resto de pais e nais e evitar que se estenda o contaxio.

Artigo escrito en colaboración con AGaEP, a Asociación Galega de Enfermaría Pediátrica.
logo_agaep

Que levar na mochila do hospital para o parto?

Cando se achegan as últimas semanas de embarazo, debes empezar a preparar a maleta para o día do parto. Este momento pode chegar sen previo aviso, polo que che recomendamos deixalo todo listo para que non se che esqueza nada coas présas finais.

Garda esta lista de imprescindibles para levar ao hospital o día do parto.

Imprescindibles na mochila para levar ao hospital

  • Artigos de aseo: Aínda que no hospital adoitan proporcionar xeles de ducha e champús, pode que prefiras utilizar os teus, por tanto, prepara un neceser con todo o necesario para o aseo: champú, xel, desodorizante, crema hidratante, cepillo e pasta de dentes, peite, secador se o adoitas usar, bálsamo de beizos e gomas para o pelo…
  • Roupa cómoda: Para estar cómoda no hospital viranche ben un par de camisóns ou pixamas soltos que che permitan dar o peito, no caso de que teñas pensado facelo, tampouco podes esquecerte das zapatillas e de bata. Pensa tamén na roupa que vas levar posta o día do parto, por se prefires levar outro conxunto para o día que saias do hospital ou se utilizas esa mesma.
  • Roupa interior: Recomendámosche incluír braguiñas refugables para as primeiras horas tras o parto, debido ao sangrado e tamén compresas de postparto. Poden ser útiles tamén as braguiñas de algodón. Doutra banda, se vas dar o peito, moitas mulleres séntense máis cómodas utilizando suxeitadores de lactación. Os discos protectores son útiles tanto se vas dar o peito coma se non, xa que os primeiros días, coincidindo coa subida do leite, podes manchar os suxeitadores ou a roupa.
  • Outros: Ademais de todo o anterior recomendámosche levar un par de cartafoles de plástico, unha coa túa historia médica durante o embarazo e plan de parto e outra para gardar os primeiros informes do bebé. Tampouco esquezas o teu móbil, cargador e documentación.

Ademais da túa maleta, necesitarás unha bolsiña para as cousas do teu bebé. Que non pode faltar nesta bolsiña?

As cousiñas do bebé para o hospital

  • Un paquete de cueiros (3 – 5kg).
  • 5 ou 6 bodies de algodón e pixamas, para ter sempre muda limpa dispoñible.
  • Babeiros ou muselinas.
  • Unha mantiña, máis fina ou máis grosa, dependendo da estación do ano.
  • Muda para a saída do hospital.
  • Artigos para o coidado da pel do bebé: leite hidratante e crema para a zona do cueiro.
  • No coche: Silliña a contra marcha para levalo no coche de volta a casa e o seu carriño ou mochila de porteo.
  • Se queres tamén podes levarlle algún peluche ou xoguete.

Estas cousas seguro que as vas usar, pero fai a túa maleta con moita calma e repasa as túas rutinas para que non che quede nada na casa. O día do parto é inesquecible xa que vas coñecer ao teu bebé así que lembra ter o móbil preparado para inmortalizar o momento!

Artigo escrito en colaboración con AGaEP, a Asociación Galega de Enfermaría Pediátrica.
logo_agaep