É importante que a pel do teu bebé estea protexida durante todo o ano. Durante o verán é cando máis se tende a coidala, pero tamén é necesario protexela das baixas temperaturas no inverno.
Non debemos quedarnos só coa idea de utilizar pezas de abrigo como gorritos, bufandas ou xerseis, porque a pel do teu bebé segue padecendo os danos do frío, a secura do ambiente, os calefactores, etc.
Se queres saber como protexer e coidar a pel do teu bebé durante o inverno, non te perdas os consellos que che deixamos a continuación.
Como é a pel do noso bebé
En primeiro lugar, sabemos que a pel dun bebé é diferente á dos adultos, é máis delicada e, por tanto, está máis exposta ao frío e á calor. Pero, por que? Contámosche algunhas características dos máis pequenos:
- A súa pel ten un ton máis pálido que a dos adultos pola falta de pigmentación e, por tanto, os raios UV aféctanlles en maior medida.
- A pel dos bebés está formada por células que non están unidas entre si. Estas células atópanse xuntas para acumular auga e protexer e manter hidratada a pel, polo que os bebés non contan aínda con esa protección.
- Aínda non son capaces de regular ben a temperatura debido á pouca graxa subcutánea, e debido a iso, padecen máis os efectos do frío e a calor.
Coidados específicos da pel do recén nacido
Se a pel dun bebé é xa delicada de por si, imaxínache a dun recén nacido! Hai dúas características claves nesta etapa que convén ter en conta:
- O cordón umbilical dos recén nacidos é o conduto que unía ao bebé coa placenta para nutrirse mentres estaba na barriga. Aínda que podamos pensar que doe manipulalo, non! Está formado por vasos sanguíneos e non ten nervios. É moi importante mantelo ben seco, e evitar mergullar aos bebés mentres o cordón non cae.
- Os recén nacidos non necesitan bañarse todos os días. Cando nacen, veñen cubertos cunha capa graxa que se coñece como vernix caseoso que tarda días en absorberse. Esta capa graxa protéxeos contra infeccións e mantén a súa pel hidratada, polo que hai que evitar o baño diario cando nacen e limitarse a limpar as zonas que se poden ensuciar, como é a zona do cuiño ou da cariña.
Efectos do frío sobre a pel dos máis pequenos
É importante saber cales son os efectos máis comúns que poden ter os bebés na súa pel, para poder evitalos.
Debido á sensibilidade da pel aos diferentes axentes externos como son o frío ou o vento, está exposta a irritacións ou algunha infección.
As zonas máis afectadas na pel dos bebés adoitan ser as fazulas e os beizos. Ademais, a cara externa das mans tamén é unha zona que debemos ter en conta á hora de protexerlle a pel ao bebé.
Por último, outro tipo de reaccións son o rubor e descamación da pel debido á fráxil barreira das súas células. Este tipo de síntomas poden ir acompañados de proído na zona, tirantez e secura.
Atopa en Gadis todo o que necesitas para a pel do teu bebé
Nos nosos supermercados Gadis dispoñemos dunha ampla gama de produtos onde poder elixir os teus imprescindibles para o coidado do teu bebé este inverno. Deixámosche por aquí algún deles:
- Crema protectora para a zona do cueiro: é importante protexer a pel coa que está en contacto o cueiro para evitar irritacións, sobre todo cando son pequeniños e fan moitas cacas ao día.
- Xel hidratante: un xel que axude a hidratar en profundidade a pel do bebé, aliviando así posibles síntomas de pel seca.
- Loción hidratante: axuda a protexer a pel do teu bebé, proporcionándolle unha sensación de suavidade á vez que hidrata.
- Aceite de améndoas: achega un toque extra de hidratación e nutrición á pel. Podes botala na auga do baño ou despois del mentres lle fas unha masaxe ao teu bebé. As masaxes nos bebés son unha ocasión ideal para conectar con eles e gozar dun momento de relax.
- Tarritos de froita: é importante protexer a pel desde o exterior, pero tamén desde o interior, achegándolle as vitaminas necesarias.
Os mellores consellos para protexer ao teu bebé do frío
Evitar cambios bruscos de temperatura
A pel do bebé pode chegar a resecarse debido ás altas variacións de temperatura ao pasar do interior ao exterior. O máis adecuado é non ter a calefacción moi alta ou abrigalos demasiado, xa que a calor tamén pode danala.
Roupa e abrigos adecuados
É recomendable vestir aos máis pequenos con roupa feita de materiais suaves e transpirables, por exemplo o algodón; aínda que tamén son bos materiais a la e a franela (é posible que algúns bebés sexan alérxicos, e, nese caso, deberíase consultar co pediatra).
Ademais, é preferible poñerlle varias pezas de roupa e non unha moi grosa que poida dar moita calor. Pensa que igual que lles colle rápido o frío… tamén a calor! En ocasións, cando hai calor ambiental e temos moi abrigado ao noso bebé, este pode suar moito e mesmo chegar a deshidratarse.
As mans e os pés dos nosos bebés están sempre, fríos, polo que intuír a súa temperatura a través da calor que desprenden as súas mans, non é a mellor opción. Por máis que lle poñamos luvas ou zapatos, isto non vai cambiar. Ademais, os bebés necesitan as súas mans para explorar o mundo e desenvolver os seus sentidos. Abrígao, pero á súa vez déixao conectar co mundo que lle rodea e coas texturas que poida tocar.
Hidratación
Este é un dos consellos máis importantes! A hidratación da pel do bebé é clave para previr esa tirantez ou gretas que pode provocar o frío do inverno. Pódese aplicar unha crema hidratante adecuada para a súa pel antes de saír á rúa, pero tamén á saída da ducha, momento para aproveitar e aplicar unha pequena masaxe e favorecer a circulación do sangue polo corpo do pequeno. Tamén podes realizar esta masaxe con aceite de améndoas, encantaralle!
Finalmente, no momento de saír á rúa, é conveniente que a crema que se utilice teña protección solar para protexer ao bebé da radiación UV.
Non abusar dos baños
A auga quente no inverno é moi apetecible, pero pode fomentar efectos que queremos evitar como, por exemplo, a secura. O ideal é non utilizar auga moi quente e que o baño dure entre 5 e 10 minutos. Tras o baño, para secar moi ben a pel é importante facelo con pequenos toquecitos e a continuación, aplicar a loción hidratante para crear unha capa protectora.
Hidratación a través da alimentación
Para coidar a pel dos bebés, o interior tamén é moi importante. Hai que mantelo hidratado con leite materno, de fórmula ou con auga no caso de que xa teña a idade adecuada para tomala.
Estes consellos axudaranche a protexer e coidar ao teu bebé cando as temperaturas son baixas, pero débese lembrar que a pel do pequeno necesita coidados durante todo o ano. Hai que utilizar as recomendacións que mellor se adapten ao bebé xa que o máis importante é mantelo con boa saúde.
Esperamos axudarche un pouquiño máis nesta aventura.
Artigo escrito en colaboración con AGaEP, a Asociación Galega de Enfermaría Pediátrica.
